ପାଟନା : ବିହାରରେ ବିଜେପି ଏବଂ ଜେଡିୟୁ ମଧ୍ୟରେ ଚାଲିଥିବା ଝଗଡାକୁ ନେଇ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋର ତୀବ୍ର ଆକ୍ରମଣ କରିଛନ୍ତି । ପ୍ରଶାନ୍ତ କିଶୋର ଟ୍ୱିଟରରେ ଲେଖିଛନ୍ତି ଯେ ବିଜେପି ଏବଂ ଜେଡିୟୁ ମଧ୍ୟରେ ଚାଲିଥିବା ଲଢେଇରେ ଜନସାଧାରଣଙ୍କ କ୍ଷତି ଘଟିଛି ଏବଂ ଜନସାଧାରଣ ମଧ୍ୟ ଏହାର ପରିଣାମ ଭୋଗୁଛନ୍ତି । ଏହା ବ୍ୟତୀତ ପ୍ରଶାନ୍ତ କିଶୋର ମଧ୍ୟ ଅଗ୍ନିପଥ ଯୋଜନା ଉପରେ ହେଉଥିବା ହିଂସାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି । ସେ କହିଛନ୍ତି ଯେ ହିଂସା ଏବଂ ତୋଡଫୋଡ଼ କରିବା ଭୁଲ ଅଟେ ।
ପ୍ରଶାନ୍ତ କିଶୋର ନିଜର ଟ୍ୱିଟର ହ୍ୟାଣ୍ଡେଲରେ ଲେଖିଛନ୍ତି, “ଅଗ୍ନିପଥ ଉପରେ ଆନ୍ଦୋଳନ ହେବା ଉଚିତ୍, ହିଂସା ଓ ତୋଡଫୋଡ଼ ନୁହେଁ । ବିହାରର ଲୋକମାନେ ଜେଡିୟୁ ଏବଂ ବିଜେପି ମଧ୍ୟରେ ପାରସ୍ପରିକ କଳହର ଶିକାର ହେଉଛନ୍ତି । ବିହାର ଜଳୁଛି ଏବଂ ଉଭୟ ଦଳର ନେତା ଏହାର ସମାଧାନ କରିବା ପରିବର୍ତ୍ତେ ପରସ୍ପରକୁ ଦୋଷ ଦେବାରେ ବ୍ୟସ୍ତ ଅଛନ୍ତି । “
ପୂର୍ବ ନିର୍ବାଚନ ରଣନୀତିଜ୍ଞ ତଥା ବର୍ତ୍ତମାନ ରାଜନୀତିରେ ପ୍ରଶାନ୍ତ କିଶୋର ବିହାରରେ ଅତ୍ୟନ୍ତ ସକ୍ରିୟ ଅଟନ୍ତି ଏବଂ ରାଜ୍ୟ ସରକାରଙ୍କ ଉପରେ ଲଗାତାର ଆକ୍ରମଣ କରୁଛନ୍ତି । ଏହାପୂର୍ବରୁ ଯେତେବେଳେ ଜହନ୍ନାବାଦରେ ଅଗ୍ନିପଥକୁ ନେଇ ହିଂସା ହୋଇଥିଲା, ପ୍ରଶାନ୍ତ କିଶୋର ମଧ୍ୟ ହିଂସା ଠାରୁ ଦୂରେଇ ରହିବାକୁ ବିକ୍ଷୋଭକାରୀଙ୍କୁ ନିବେଦନ କରିଥିଲେ । ହିଂସା ଦ୍ୱାରା ତାଙ୍କର ଆନ୍ଦୋଳନ ଦୁର୍ବଳ ହେବ ବୋଲି ସେ କହିଥିଲେ । ଯଦି ସେମାନେ ଶାନ୍ତ ରହନ୍ତି, ତେବେ ସରକାର ସେମାନଙ୍କ ସ୍ୱର ଶୁଣିବାକୁ ବାଧ୍ୟ ହେବେ । କହିବାକି, ପ୍ରଶାନ୍ତ କିଶୋର ଜଣ ସ୍ୱରାଜ ମାଧ୍ୟମରେ ବିହାରର ଅଲଗା-ଅଲଗା କ୍ଷେତ୍ର ବୁଲୁଛନ୍ତି । ସେ କହିଛନ୍ତି ଯେ ସେ ବିହାରରେ ଏକ ନୂତନ ରାଜନୈତିକ ବ୍ୟବସ୍ଥା ସୃଷ୍ଟି କରିବାକୁ ଚାହୁଁଛନ୍ତି ।
