Gujarat Assembly Elections: ଆଗାମୀ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି କଂଗ୍ରେସ ନେତା ରାହୁଲ ଗାନ୍ଧୀ ଆଜି ଗୁଜୁରାଟ ଗସ୍ତରେ ଅଛନ୍ତି । ଏହି ସମୟରେ ସେ ଅନେକ ନିର୍ବାଚନ ପ୍ରତିଶ୍ରୁତି ଦେଇଥିଲେ ଏବଂ ବିଜେପିକୁ କଡ଼ା ସମାଲୋଚନା କରିଥିଲେ । ସେ କହିଛନ୍ତି ଯେ ଯଦି କଂଗ୍ରେସ ସରକାର ଗୁଜୁରାଟରେ ଆସେ ତେବେ ଉପଭୋକ୍ତାଙ୍କୁ 500 ଟଙ୍କାରେ ଏଲପିଜି ସିଲିଣ୍ଡର ଯୋଗାଇ ଦିଆଯିବ ।
ବାସ୍ତବରେ, ରାହୁଲ ଗାନ୍ଧୀ ସାବରମତୀ ରିୱରଫ୍ରଣ୍ଟରେ କଂଗ୍ରେସର ପରିବର୍ତନ ସଂକଳ୍ପ ସମାବେଶକୁ ସମ୍ବୋଧିତ କରୁଥିଲେ । ସେ କହିଛନ୍ତି ଯେ କଂଗ୍ରେସ କ୍ଷମତାକୁ ଆସିବା ପରେ ଗୁଜୁରାଟର ଚାଷୀଙ୍କୁ ମାଗଣା ବିଦ୍ୟୁତ ଦିଆଯିବ ଏବଂ ସାଧାରଣ ଗ୍ରାହକଙ୍କୁ 300 ୟୁନିଟ୍ ମାଗଣା ବିଦ୍ୟୁତ ମଧ୍ୟ ମିଳିବ । ଏହା ସହିତ 3 ଲକ୍ଷ ଟଙ୍କା ପର୍ଯ୍ୟନ୍ତ କୃଷି ଋଣ ଛାଡ କରାଯିବ ।
ବିଜେପିକୁ ଟାର୍ଗେଟ କରି ରାହୁଲ କହିଛନ୍ତି ଯେ ଗୁଜରାଟ ଡ୍ରଗ୍ସର କେନ୍ଦ୍ରରେ ପରିଣତ ହୋଇଛି । ସମସ୍ତ ଡ୍ରଗ୍ସ ମୁଣ୍ଡ୍ରା ପୋର୍ଟରୁ ବାହାରୁଛି । ଏହି ପ୍ରସଙ୍ଗରେ କାହିଁକି ପଦକ୍ଷେପ ନିଆଯାଉ ନାହିଁ ବୋଲି ସେ ପ୍ରଶ୍ନ କରିଛନ୍ତି । ମୁଣ୍ଡ୍ରା ପୋର୍ଟରେ ପ୍ରତି 2-3 ମାସରେ ଡ୍ରଗ୍ସ ମିଳିଥାଏ, ଯାହା ଗୁଜୁରାଟର ଯୁବକଙ୍କ ଭବିଷ୍ୟତକୁ ନଷ୍ଟ କରୁଅଛି ।
ରାହୁଲ କହିଛନ୍ତି ଯେ ବିଜେପି ସରକାର ହଜାର ହଜାର ବିଦ୍ୟାଳୟ ବନ୍ଦ କରିଦେଇଛନ୍ତି କିନ୍ତୁ କଂଗ୍ରେସ 3000 ଇଂରାଜୀ ମଧ୍ୟମ ବିଦ୍ୟାଳୟ ଖୋଲିବ । ରାଜ୍ୟରେ ବାଳିକାମାନଙ୍କୁ ମାଗଣା ଶିକ୍ଷା ଦିଆଯିବ । ସେ କହିଛନ୍ତି ଯେ ସେ ବେକାରୀ ସମସ୍ୟାକୁ ଶେଷ କରିବାକୁ ଚାହୁଁଛନ୍ତି । ଗୁଜୁରାଟରେ 10 ଲକ୍ଷ ଯୁବକଙ୍କୁ ରୋଜଗାର ଯୋଗାଇବା ଉପରେ ଧ୍ୟାନ ଦିଆଯିବ । ଏକ ଗ୍ୟାରେଣ୍ଟି ଦେଇ ରାହୁଲ କହିଛନ୍ତି ଯେ ଗୁଜରାଟରେ କଂଗ୍ରେସ ଦଳର ସରକାର ଗଠନ ହେବ ।
ବାସ୍ତବରେ, ଗୁଜରାଟରେ ହେବାକୁ ଥିବା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ସମସ୍ତ ରାଜନୈତିକ ଦଳ ରାଜ୍ୟବାସୀଙ୍କୁ ଲୋଭାଇବାରେ ଲାଗିଛନ୍ତି । ଏହି ସମୟରେ ଆଜି ରାହୁଲ ଗାନ୍ଧୀ ମଧ୍ୟ ଗୁଜୁରାଟର ଲୋକଙ୍କୁ ଅନେକ ନିର୍ବାଚନ ପ୍ରତିଶୃତି ଦେଇଛନ୍ତି ।
