ମୁମ୍ବାଇ: ଶନିବାର ସନ୍ଧ୍ୟାରେ ଏକ ସଡ଼କ ଦୁର୍ଘଟଣାରେ ବଲିଉଡ ଅଭିନେତ୍ରୀ ମଲାଇକା ଆରୋରା ଆହତ ହୋଇଛନ୍ତି । ଗଣମାଧ୍ୟମ ରିପୋର୍ଟ ଅନୁଯାୟୀ, ମହାରାଷ୍ଟ୍ରର ଖୋପୋଲିରେ ଏକ୍ସପ୍ରେସୱେରେ ଅଭିନେତ୍ରୀଙ୍କ କାର ଦୁର୍ଘଟଣାର ସମ୍ମୁଖୀନ ହୋଇଥିଲା । ଏହି ଦୁର୍ଘଟଣାରେ ମଲାଇକା ସାମାନ୍ୟ ଆହତ ହୋଇଥିଲେ ଏବଂ ତୁରନ୍ତ ତାଙ୍କୁ ନିକଟସ୍ଥ ଆପୋଲୋ ହସ୍ପିଟାଲରେ ଭର୍ତ୍ତି କରାଯାଇଥିଲା ।
ଖୋପୋଲି ପୋଲିସ ଷ୍ଟେସନର ପୋଲିସ ଇନ୍ସପେକ୍ଟର ଶିରିଶ ପାୱାର ଏକ ପ୍ରମୁଖ ଇଂରାଜୀ ଖବରକାଗଜକୁ ସୂଚନା ଦେଇ କହିଛନ୍ତି, 'ଏହି ଦୁର୍ଘଟଣା ମୁମ୍ବାଇ-ପୁଣେ ଏକ୍ସପ୍ରେସୱେରେ 38 କିଲୋମିଟର ଦୂରରେ ଘଟିଛି, ଯାହା ଏକ ଦୁର୍ଘଟଣା ପ୍ରବଣ ଅଞ୍ଚଳ ଅଟେ । ତିନୋଟି ଯାନ ପରସ୍ପର ସହ ମୁହାଁମୁହିଁ ଧକ୍କା ହେବା ସହ ସମସ୍ତ ତିନୋଟି ଗାଡି ନଷ୍ଟ ହୋଇଯାଇଥିଲା । ଦୁର୍ଘଟଣା ପରେ ମୋଟର ଚାଳକମାନେ ଶୀଘ୍ର ପଳାଇ ଯାଇଥିଲେ ଏବଂ କେଉଁ ପ୍ରକାରର ଆଘାତ ଘଟିଛି ତାହା ସ୍ପଷ୍ଟ ହୋଇନାହିଁ । ଆମକୁ କୁହାଯାଇଛି ଯେ ସମସ୍ତେ ସାମାନ୍ୟ ଆଘାତ ପାଇଛନ୍ତି ।ସେ ଆହୁରି ମଧ୍ୟ କହିଛନ୍ତି ଯେ, “ବର୍ତ୍ତମାନ ପୋଲିସ ଏହି ଘଟଣାର ଅନୁସନ୍ଧାନ କରୁଛି, ପରେ ଏଫ୍ଆଇଆର୍ ଦାଖଲ କରାଯିବ । ତିନୋଟି କାରର ରେଜିଷ୍ଟ୍ରେସନ୍ ନମ୍ବର ପାଇଛୁ ଏବଂ ପ୍ରକୃତରେ କ’ଣ ଘଟିଛି ତାହା ବୁଝିବା ପାଇଁ ମାଲିକଙ୍କ ସହ ଯୋଗାଯୋଗ କରିବୁ ବୋଲି ସେ କହିଛନ୍ତି । ବର୍ତ୍ତମାନ ସମୟରେ ଆମେ ଏହି ଘଟଣା ବିଷୟରେ ଉଲ୍ଲେଖ କରିଛୁ ଏବଂ ଦୁର୍ଘଟଣା କିପରି ଘଟିଲା ଏବଂ କାହାର ଦୋଷ ତାହା ଅନୁସନ୍ଧାନ କରିବା ପରେ ଏକ ଏଫ୍ଆଇଆର୍ ପଞ୍ଜିକୃତ ହେବ ବୋଲି ସେ କହିଛନ୍ତି ।
ଏହି ସମୟରେ ଅଭିନେତ୍ରୀଙ୍କ ଭଉଣୀ ଅମୃତା ମଧ୍ୟ ETimes କୁ ନିଶ୍ଚିତ କରି କହିଛନ୍ତି ଯେ ସେ ବର୍ତ୍ତମାନ ଭଲରେ ଅଛନ୍ତି । ଅମୃତା କହିଛନ୍ତି, ‘ମଲାଇକା ବର୍ତ୍ତମାନ ଭଲ ହୋଇଯାଉଛନ୍ତି ।
